Kavva aschar EU

27 temmar aschar ninna dova Europeiska Union, EU. Svedikko-temmen aschar ninna sen dova 1:to januari 1995. Dolla EU:engre temmar buttar kettanes dre butten lovengre ta politikke puttchepan.

EU-temmarna ler an neve lagar forr dollengre temmar. Beslut palla dova les an dre Europaparlamentet ta ministerådet. Glan beslut les an har rakkrepangre fonn vavera temmar rakkrat ta förhandlat sinsimassker.

Dova Sveddiko regering ta riksdag aschar beida dy dre buttepan kai aschar forr te le an EU-lagar. Dre Svedikko-temmen kammar regering, riksdag ta dolla temmengre myndigheter uchlepa te le an ta pallan-ja EU-lagar.

Kai temmengro dre Svedikko-temmen motte je manusch påverka buttepan dre EU vri’ann siro stämma dre vällkrepan to riksdag ta Europaralamentet, eller masskar je opinion kai hanndras pre vaverschannes.

Horrtepan kai EU:ngro manusch

Dollo kai hunkar temmengro manusch dre je EU-temm aschar ninna EU:ngro manusch. Dova delar tchommena horrtepan. Je EU:ngro motte kai exempel

  • te vällkra save politikke-beddosa kai ska le te bescha dre Europaparlamentet. 
  • kamma pirropa te tradra trujall eller kera buttepa ta le sikkrepa dre je vaver EU-temm.
  • te le hasstrepa fonn vaver EU-temmengro ambassad tellan tradrepan vri’ann EU
  • bischtra e-lill eller lill to EU:ngre institutioner pre tchommet fonn dolla EU:ngre officiella rakkrepan, kai Svedikko-rakkrepa, ta le svarepa pre siro jegno rakkrepa.
  • te le EU:ngre lagar ta ranndrapan pre siro jegno rakkrepa.
  • te ja to dova EU:ngro ombudsman kanna jekk dennkrar lo aschar bangnot behandlad fonn je EU:ngro institution.

Kavva kerar EU

Svedikko-temmen ta dolla vavera EU-temmar kammar je kettanes buttepa trujall lovengre ta politikke puttchepan, kanna dollen dennkrar att kettenes aschar fedder fonn kokkaro. Ekonomisk tillväxt, butter manusch kai kammar buttepa ta vaver glanepa kai aschar hållbar forr sassare EU-temmar kettanes, ta je kettanes-kerdo schinnepa, aschar tchommena fonn lenngre sillon.

Dolla glandune regler forr dova EU:ngro kettanepa aschar ranndrade tele, dre lill kai karrar fördrag. Dre dolla fördrag pukkas så EU motte le beslut pallan ta tchakkes dova motte keras. Dolla fördrag aschar kai je grundlag dre vaver temm. Svakko EU-temm har lett an dolla fördrag ta uchlepan te pallan-ja dollen.

EU-temmar kammar kettenes buttepa pallan

  • Schinnepa
  • Regional utveckling
  • Lovengro hasstrepa to jordbruk
  • Forskning
  • Energi
  • Puttchepan palla miljö
  • Brottsbekämpning
  • Politikke putchepan palla vavre temmengre naschepangre

Kavva kerar EU tchi 

EU-temmar kammar uchlepa forr puttchepan kai skatter, sjukvård, sikkrepa, pensioner ta barnbidrag.